हेटौंडा/६ भदौ
अपहरणमा परेका हेटौंडाका दुई जनाको सकुशल उद्धार गरिएको छ ।

हेटौंडा उपमहानगरपालिका वडा नंबर ९ स्वागत टोल बस्ने २३ वर्षीय गोबिन्द श्रेष्ठ र सोही स्थान बस्ने २२ वर्षीय पवन राना मगरको सकुशल उद्धार गरिएको जिल्ला प्रहरी कार्यालय मकवानपुरले जनाएको छ ।

श्रेष्ठ र मगरलाई गएको भदौ ३ गते राती तीन जना भारतीय नागरिकले हेटौंडा-१० बसपार्कबाट अपहरण गरेका थिए । उनीहरुलाई अपहरण गरी भारतको मोतीहारी पुर्याइएको थियो ।

अपहरणकारीले दुबै जनालाई भारतको मोतीहारीमा बन्धक बनाई भारु पाँच लाख फिरौती समेत माग गरेको जिल्ला प्रहरी कार्यालय मकवानपुरका प्रवक्ता जयश्वर रिमालले जानकारी दिनुभयो ।

अपहरणमा परेका दुबै जनालाई शनिबार भारतीय प्रहरीको सहयोगमा सकुशल उद्धार गरी आफन्तको जिम्मा लगाइएको प्रवक्ता रिमालले बताउनु भयो । घटनाको सम्बन्धमा थप अनुसन्धान भइरहेको जिल्ला प्रहरी कार्यालय मकवानपुरले जनाएको छ ।