थाहानगर/३० असार
अहिलेसम्म कोभिड—१९ (कोरोना भाइरस) खोपको पहिलो डोज नपाएकाहरुलाई भोलि असार ३१ गते र साउन १ गते थाहाका सबै स्वास्थ्य केन्द्रहरुमा खोप लगाइने भएको छ । 

तर, यस पटक सामुदायिक तथा निजी विद्यालयका शिक्षक, कर्मचारीहरुले पनि खोप लगाउन पाउनेछन् । खोप लगाउनका लागि सम्बन्धित निकायबाट जारी गरिएको परिचय पत्र अनिवार्य बोक्नु पर्नेछ ।

विद्यालयमा कार्यरत शिक्षक, कर्मचारी तथा चालक, सहचालकका हकमा भने विद्यालयबाट जारी परिचय पत्र वा विद्यालयको पत्र अनिवार्य गरिएको छ । यसैगरी, चालक तथा सहचालकका हकमा थाहानगरबाट संचालित सार्वजनिक सवारी चालक वा सहचालक भएको प्रमाण खुल्नु पर्नेछ । 

यी बाहेक यस अघि छुटेका वा नलिएका ५५ वर्ष माथिका सबै नागरिकले खोप पाउने छन् । त्यसका लागि नागरिकता प्रमाणपत्र साथमै लैजानु पर्नेछ । 

थाहा नगरका लागि यस पटक १९५० डोज भेरोसेल खोप आएको छ ।